Ya encabeza el Alcalde John Dalipe y Vice Alcalde Josephine Pareja con el programa comemorativa que ta celebra el Dia de Fundacion de Chabacano, Viernes por la noche, Junio 23 na Astoria Regency na Pasonanca.
El juramiento de los miembros del Local Council for Cullture, Arts and History (LCCAH) y el entregada del Adjudicacion de Reconocimiento para los cantores y amigos de Camins, un grupo que ta continua rindi maga cancion chabacano por el amor de la Ciudad de Zamboanga, amo el punto culminante del programa comemorativa.
Na su mensaje, el Alcalde Dalipe ya enfatiza el significancia del Dia de Fundacion de chabacano, hablando cay este ta marca el principio del importante tesoro y rico cultura del la Ciudad de Zamboanga.
Ya solicita el suporta del todo residente especialmente del maga jovenes el Alcalde na advocacia para continua preserva y promova el lenguaje chabacano por medio de conversar y entender el lenguaje aqui man na Ciudad o na otro parte del pais y mundo.
El celebracion istipulao na Ordinanza 374 que ya aprova del anio 2011 y ta declara con el Junio 23 cada anio como Dia de Fundacion Chabacano que ta responde con el deseo para preserva y promova el chabacano, el que se llama Spanish derivative language, que ya principia del Junio 23, 1635 cuando ya coloca el piedra angular del Fortaleza de San Jose, que ahora conosido como el Fortaleza del Pilar.
Presente durante el programa comemorativa el Congresista del Distrito Uno Khymer Olaso, maga miembros del Consejo Local – Consejal Vincent Paul Elago, Vino Guingona, Jerome Santos, Fred Atilano y Boday Cabato, maga hefe del diferente departamento del Ciudad y maga hefe del diferente agencia nacional inclujido maga representantes desde academia, sector de seguridad y otras pa. (photo credits: Miljohn Mancao/ CMO-PIO)